ખેરગામ: 13 વર્ષીય ભત્રીજીને તેના જ કૌટુંબિક કાકાએ દાનત બગાડી 8 મહિના અગાઉથી અનેકવાર એકલતાનો લાભ લઇ જબરજસ્તી દુષ્કર્મ આચરી ગર્ભવતી બનાવી દેવાનો એક કિસ્સો પ્રકાશમાં ચકચાર મચી જવા પામ્યો હોવાનું જાણવા મળી રહ્યું છે.
Decision News ને મળેલી માહિતી મુજબ ખેરગામ તાલુકાના એક ગામડામાં રહેતા શ્રમિક પરિવારની 13 વર્ષીય બાળાને તેના જ કૌટુંબિક કાકાએ હવસનો શિકાર બનાવી હતી. 8 મહિના અગાઉ પીડિતાના માતા પિતા સંબંધીઓના ભરોસે મોટા દીકરા અને દીકરીને મુકી ધાર્મિક યાત્રાએ ગયા હતા. લગભગ અઠવાડિયાની આ યાત્રા દરમિયાન 13 વર્ષીય પીડિતા અને તેનો ભાઈ એકલા જ ઘરે હતા. એ સમય દરમિયાન તેમના કૌટુંબિક કાકા 25 વર્ષીય બ્રિજેશ નાયકાએ 8 માં ધોરણમાં ભણતી તેની ભત્રીજીને એકલી જોઈ તેના ઉપર દાનત બગાડી હતી અને તેની સાથે દુષ્કર્મ આચર્યું હતુ.
પીડિતાએ કાકાનો બહુ વિરોધ ન કર્યો,કેમ કે બ્રિજેશે તેને મારી નાંખવાની ધમકી પણ આપી હતી. જેથી ગભરાયેલી પીડિતાએ કોઈને પણ કંઈ કહ્યુ ન હતું. જેનો ફાયદો લઈ નરાધમ રાક્ષસ બ્રિજેશે માસુમ બાળકીને અનેક વાર જબરદસ્તીથી પીંખી હતી. જેને કારણે પીડિતાને ગર્ભ રહી ગયો હતો. ગત 10 ફેબ્રુઆરીના રોજ બાળકીને પેટમાં દુઃખાવો ઉપડતા તેણે માતાને કહ્યું અને નજીકના પ્રાથમિક આરોગ્ય કેન્દ્ર ઉપર બતાવવા જતા, ડોક્ટરે તપાસી 7 મહિનાનો ગર્ભ હોવાનું કહેતા જ માતા પિતાના પગ તળેથી જમીન સરકી ગઈ હતી.
જોકે બ્રિજેશની ધમકીને કારણે પીડિતા તેના માતા પિતાને કઈ કહેવા તૈયાર ન હતી. પરંતુ તેની માતાએ તેને સાંત્વના આપી, શાંતિથી સમજાવીને પૂછ્યું ત્યારે બ્રિજેશ કાકાએ બદકામ કર્યું હોવાનું જણાવતા પરિવારજનોના હોશ ઉડી ગયા હતા. હાલમાં પીડિતાની માતાની ફરિયાદને આધારે ખેરગામ પોલીસે આરોપી હેવાન કાકાની ધરપકડ કરી જેલના સળિયા ગણતો કરી દીધો છે.
