સુરત: સુરતના અડાજણમાં આવેલા સ્ટાર બજાર ખાતે આજરોજ અકસ્માત સર્જાયો હતો. જેમાં મનપાની કચરા ડમ્પરે માઇક્રોબાયોલોજીની વિદ્યાર્થિનીને કચડી મારતા અરેરાટી મચી હતી. મોપેડ પર કોલેજથી ઘરે જતી વખતે વિદ્યાર્થિનીને રસ્તામાં કાળ ભેટી ગયો હતો. પરિવારજનો દ્વારા આક્ષેપ કરવામાં આવ્યો હતો કે એક કલાક સુધી વિદ્યાર્થીને એની લાશ રસ્તા ઉપર રઝળતી રહી હતી.
Decision News ને મળેલી માહિતી મુજબ અડાજણ પોલીસ એક કલાક સુધી સ્થળ પર ન આવી હોવાનો આક્ષેપ કરવામાં આવ્યો છે. જહાંગીરપૂરા વિસ્તારમાં આવેલ ડાયમંડ નગરમાં 20 વર્ષીય શ્રેયા જિતેન્દ્ર સારંગ પરિવારમાં એક ભાઈ અને માતા સાથે રહેતી હતી. શ્રેયાના પિતાનું વર્ષ 2012માં હાર્ટએટેકથી મોત નિપજ્યું હતું. શ્રેયા અઠવાલાઇન્સ ખાતે સ્કેટ કોલેજની પાછળ શ્રી રામકૃષ્ણ મેડિકલ કોલેજમાં બાઈક્રો બાયોલોજીના ત્રીજા વર્ષમાં અભ્યાસ કરતી હતી.
આજરોજ શ્રેયા સવારે કોલેજ ગઈ હતી અને પોતાની મોપેડ પર કોલેજથી ઘરે જતી હતી. તે દરમિયાન અડાજણ વિસ્તારના સ્ટાર બજાર પાસે પૂરપાટ આવતી મનપાના કચરાના ડમ્પર ચાલકે શ્રેયાને અડફેટે લીધી હતી. જેથી અકસ્માતમાં મેડિકલ વિદ્યાર્થિનીનું ગંભીર ઇજાના કારણે ઘટના સ્થળે જ મોત થયું હતું. શ્રેયાનું અકાળે મોત થતાં પરિવારમાં શોકનું મોજું ફરી વળ્યું છે. બનાવ અંગે અડાજણ પોલીસે આગળની કાર્યવાહી સાથે વધુ તપાસ હાથ ધરી છે.
