વઘઈ: ગતરોજ ડાંગ જિલ્લા વહીવટી તંત્ર દ્વારા આયોજીત અખીલ ભારતીય શાળાકીય રમતોત્સવ, ૨૦૨૩માં રંભાસના જ્ઞાનસેવા વિદ્યા સંકુલનાં વિધાર્થીઓએ તાલુકા અને જિલ્લા કક્ષાએ ઉત્કૃષ્ટ પ્રદર્શન કરી શાળાને ગૌરવ અપાવ્યું હતું.
Decision News ને પ્રાપ્ત થયેલી વિગતો મુજબ રંભાસનાં વિદ્યાર્થિની બહિરામ શિવાનીબેન સુરેશભાઈએ તાજેતરમાં આહવા ખાતે યોજાયેલા જિલ્લા કક્ષાનાં શાળાકીય રમતોત્સવમાં યોગાસનની (અંડર-૧૭) સ્પર્ધામાં પ્રથમ નંબર પ્રાપ્ત કર્યો હતો. ઉપરાંત શાળાના વિદ્યાર્થીઓએ તાલુકા કક્ષાએ યોજાયેલા શાળાકીય રમતોત્સવમાં કબડ્ડીની ઇવેન્ટમાં પ્રથમ નંબર પ્રાપ્ત કરી, સાપુતારા ખાતે યોજાયેલા જિલ્લા કક્ષાના શાળાકીય રમતોત્સવમાં કબડ્ડી (અંડર-૧૭) ની સ્પર્ધામાં વઘઈ તાલુકાનું પ્રતિનિધિત્વ કર્યું હતું. જેમાં શાળાના વિદ્યાર્થીઓએ શ્રેષ્ઠ પ્રદર્શન કરી કબડ્ડીની રમતમાં જિલ્લા કક્ષાએ પ્રથમ નંબર પ્રાપ્ત કર્યો હતો. જ્યારે જિલ્લા કક્ષાની એથલેટિક્સ રમતોમાં પણ શાળાના વિધાર્થીઓ અદ્ભુત પ્રદર્શન કરી ઝળક્યા હતાં. વિવિધ રમતો પૈકી ગોળા ફેંક (અંડર-૧૯) સ્પર્ધામાં ધોરણ ૧૨ના વિદ્યાર્થી, ભોયે દિવ્યેશભાઈ દશરથભાઈ અને લાંબી કૂદ (અંડર-૧૯) સ્પર્ધામાં ધોરણ-૧૨ની વિદ્યાર્થીની, બોચલ રૂપાલીબેન સોનિયાભાઈ એ, જિલ્લા કક્ષાની સ્પર્ધામાં પ્રથમ નંબર પ્રાપ્ત કર્યો હતો.
તમામ વિજેતા વિદ્યાર્થીઓના ઉત્કૃષ્ટ પ્રદર્શનથી અને સફળતાથી શાળા પરિવારમાં ખુશી અને ગર્વની લાગણી અનુભવાઇ હતી. તમામ વિધાર્થીઓ કે જેમણે જિલ્લા કક્ષાની સ્પર્ધામાં પ્રથમ ક્રમ પ્રાપ્ત કરી શાળા પરિવારનું નામ રોશન કર્યું, તેઓનું આ ઉપલબ્ધિ મેળવવા બદલ શાળાના માર્ગદર્શક એવા શ્રી મંગલનયન સ્વામી, શ્રી મુનીચરણ સ્વામી, ટ્રસ્ટીશ્રીઓ અને આચાર્યશ્રીએ અભિનંદન પાઠવ્યા હતાં.
